10 அணிகள் களமாடும் 19-வது ஐ.பி.எல். தொடர் மார்ச் 28-ம் தேதி முதல் கோலாகலாமாக தொடங்கியது. மே 31-ம் தேதி வரை இந்தியாவின் பல்வேறு நகரங்களில் நடக்கும் இத்தொடரில், நேற்று செவ்வாய்க்கிழமை கவுகாத்தியில் நடைபெற்ற 13-வது லீக் ஆட்டத்தில் ராஜஸ்தான் ராயல்ஸ் - மும்பை இந்தியன்ஸ் அணிகள் மோதின. மழையின் குறுக்கீடு காரணமாக போட்டி 11 ஓவர்களாக குறைக்கப்பட்டது. இதையடுத்து, டாஸ் வென்ற மும்பை இந்தியன்ஸ் பவுலிங் வீசுவதாக அறிவித்தது. அதனால், முதலில் பேட்டிங் ஆடிய ராஜஸ்தான் அணியில் கடைசி வரை ஆட்டமிழக்காமல் களத்தில் இருந்த தொடக்க வீரர் யஷஸ்வி ஜெய்ஸ்வால் தனது சிறப்பான ஆட்டத்தை வெளிப்படுத்தினார். அரைசதம் விளாசிய அவர் 32 பந்துகளில் 10 பவுண்டரி, 4 சிக்சருடன் 77 ரன்கள் குவித்தார். இதேபோல், இளம் வீரரான மற்றொரு தொடக்க வீரர் வைபவ் சூர்யவன்ஷி 14 பந்துகளில் 1 பவுண்டரி, 5 சிக்ஸரை பறக்கவிட்டு 39 ரன்கள் எடுத்தார். இறுதியில், 11 ஓவர்கள் முடிவில் 3 விக்கெட் இழப்புக்கு ராஜஸ்தான் அணி 150 ரன்கள் எடுத்தது. இதையடுத்து, 151 ரன்கள் கொண்ட வெற்றி இலக்கை துரத்திட மும்பை அணி களமிறங்கியது. அந்த அணியின் டாப் ஆடர் வீரர்கள் சொற்ப ரன்னில் வெளியேறி அதிர்ச்சி கொடுத்தனர். குறிப்பாக, தொடக்க வீரர் ரோகித் சர்மா 5 ரன்னுக்கும், சூரியகுமார் யாதவ் 6 ரன்னுக்கும், கேப்டன் ஹர்திக் பாண்டியா 9 ரன்னுக்கும் அவுட் ஆகி பெரும் ஏமாற்றம் அளித்தனர். மிடில் ஆடரில் ஆடிய நமன் திர் மற்றும் ஷெர்பன் ரதர்ஃபோர்ட் தலா 25 ரன்கள் எடுத்து ஆறுதல் அளித்தனர். லோ-ஆடரில் ஆடிய வீரர்களும் சொற்ப ரன்னுக்கே நடையைக் கட்டினர். இறுதியில், 11 ஓவர்கள் முடிவில் 9 விக்கெட் இழப்புக்கு மும்பை அணி 123 ரன்கள் எடுத்தது. இதனால், ராஜஸ்தான் 27 ரன்கள் வித்தியாசத்தில் அபரா வெற்றி பெற்றது. ஆட்டத்தின் நாயகனாக யஷஸ்வி ஜெய்ஸ்வால் தேர்வு செய்யப்பட்டார். எகிறி எகிறி அடிக்கிறான்😂 pic.twitter.com/V4CQBsCgEs — Black cat (@Cat__offi) April 8, 2026 இந்த நிலையில், ராஜஸ்தானிடம் தோல்வியடைந்த மும்பை அணியை நெட்டிசன்கள் பங்கமாக கலாய்த்து வருகிறார்கள். நீயா நானா நிகழ்ச்சியில் இளைஞர் ஒருவர் பேசி பிரபலமான வீடியோவை மார்பிங் செய்து கிண்டல் செய்து வருகிறார்கள். இந்த வீடியோ தற்போது சமூக வலைதள பக்கங்களில் வைரலாகி வருகிறது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
