உறைந்து கிடக்கும் அண்டார்டிகாவின் மையப்பகுதியில், மனித நடமாட்டமே இல்லாத ஒரு இடத்தில் 29 பேர் கொண்ட விஞ்ஞானிகள் குழு ஒரு சாகசத்தை நிகழ்த்தியுள்ளது. அரை கிலோமீட்டர் தடிமனான பனிக்கட்டிக்கு அடியில், சுமார் 228 மீட்டர் ஆழத்திற்குத் துளையிட்டு, அங்கிருந்த மண் மற்றும் பாறைகளை வெளியே எடுத்துள்ளனர். இது அண்டார்டிகா வரலாற்றிலேயே மிக ஆழமான 'செடிமென்ட் கோர்' எடுக்கும் சாதனை ஆகும். விஞ்ஞானிகள் தோண்டி எடுத்த அந்தப் படிமங்கள் (Sediment) ஒரு மிகப்பெரிய உண்மையை உரக்கச் சொல்கின்றன. 523 மீட்டர் தடிமனான பனி படர்ந்துள்ள அந்த இடத்தில், ஒரு காலத்தில் திறந்த வெளிப்பெருங்கடல் இருந்துள்ளது. அந்தப் படிமங்களில் சூரிய ஒளி இருந்தால் மட்டுமே உயிர் வாழக்கூடிய கடல்வாழ் உயிரினங்களின் எச்சங்கள் மற்றும் சிப்பிகள் கிடைத்துள்ளன. இப்போது பனிப்பாறையாகக் காட்சி அளிக்கும் அந்தப் பகுதியில், ஒரு காலத்தில் பனியே இல்லாமல் கடல் அலைகள் வீசிக்கொண்டிருந்தன என்பது உறுதியாகியுள்ளது. இந்த ஆய்வின்மூலம் கிடைத்த படிமங்கள் சுமார் 2.3 கோடி ஆண்டுகால வரலாற்றைத் தன்னுள் வைத்துள்ளன. பூமி இப்போது இருப்பதை விட 2°C அதிக வெப்பமாக இருந்த காலங்களில், இந்தப் பனி அடுக்குகள் எப்படி உருகின என்பதை இது காட்டுகிறது. தற்போது அண்டார்டிகா ஆண்டுக்கு 135 கிகாடன்கள் பனியை இழந்து வருவதாக நாசாவின் (NASA) செயற்கைக்கோள் தரவுகள் கூறுகின்றன. ஒருவேளை மேற்கு அண்டார்டிகா பனி அடுக்குகள் முழுவதும் உருகினால், உலக கடல் மட்டம் 4 முதல் 5 மீட்டர் (16 அடி வரை) உயரக்கூடும். இது கடற்கரையோரம் வாழும் 68 கோடி மக்களின் வாழ்வாதாரத்தைச் சிதைக்கக்கூடியது. இந்தச் சாதனை அத்தனை எளிதாக நிகழ்ந்துவிடவில்லை. இதற்கு முந்தைய இரண்டு முயற்சிகள் தொழில்நுட்பக் கோளாறுகளால் தோல்வி அடைந்தன. 3-வது முயற்சியில்தான் இந்த 228 மீட்டர் இலக்கை எட்டியுள்ளனர். இதற்கு முன் வெறும் 10 மீட்டர் வரை மட்டுமே துளையிட முடிந்து இருந்தது குறிப்பிடத்தக்கது. அருகிலுள்ள பேஸ் கேம்பிலிருந்து 700 கி.மீ தொலைவில் தங்கியிருந்து இந்தச் சாதனையைப் படைத்துள்ளோம். இது அண்டார்டிகா அறிவியலின் புதிய எல்லை என்கிறார் முதன்மை விஞ்ஞானி டாக்டர் மோலி பேட்டர்சன். இந்த 228 மீட்டர் நீளப் படிமங்கள் தற்போது 10 நாடுகளைச் சேர்ந்த 120 விஞ்ஞானிகளின் ஆய்வுக்கு உட்படுத்தப்பட உள்ளன. கடல் நீர் எந்த வெப்பநிலையில் இருந்தது? பனிப்பாறைகள் எவ்வளவு வேகமாக உருகின? போன்ற கேள்விகளுக்கு விடை கிடைத்தால், எதிர்காலத்தில் கடல் மட்டம் உயர்வதை நாம் மிகத் துல்லியமாகக் கணிக்க முடியும். அண்டார்டிகாவின் ஆழத்தில் புதைந்துள்ள இந்த மண், நமது பூமியின் எதிர்காலத்தைப் பாதுகாக்கும் திறவுகோலாக மாறப்போகிறது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
