பிரபஞ்சத்தின் விதிகளை மாற்றி எழுதும் புதிய கோளை வானியலாளர்கள் கண்டறிந்துள்ளனர். இது இங்கே இருக்கவே கூடாது என்று சொல்லப்படும் ஒரு கோள், சிறிய நட்சத்திரத்தைச் சுற்றி வருவதைக் கண்டு விஞ்ஞானிகள் வியப்பில் ஆழ்ந்துள்ளனர். பொதுவாக, ஒரு பெரிய கோள் உருவாக வேண்டுமென்றால், அதன் தாய் நட்சத்திரமும் பெரியதாக இருக்க வேண்டும். ஆனால், TOI-5205 b என்ற இந்தக் கோள், வியாழன் (Jupiter) கிரகத்தின் அளவுள்ள ஒரு ராட்சத வாயுக்கோள். இது சுற்றி வரும் நட்சத்திரமோ சூரியனை விட மிகச்சிறிய 'M-குள்ள நட்சத்திரம்' ஒரு எலுமிச்சை பழத்தைச் சுற்றி ஒரு பெரிய தர்பூசணி பழம் சுற்றினால் எப்படி இருக்குமோ, அப்படி ஒரு அமைப்பில் இந்த நட்சத்திரமும் கோளும் உள்ளன. தற்போதைய அறிவியல் கோட்பாடுகளின்படி இவ்வளவு சிறிய நட்சத்திரத்தால் இவ்வளவு பெரிய கோளை உருவாக்கியிருக்க முடியாது. அதனால்தான் இது தடை செய்யப்பட்ட கோள் என அழைக்கப்படுகிறது. உலகின் சக்திவாய்ந்த ஜேம்ஸ் வெப் விண்வெளித் தொலை நோக்கி மூலம் சர்வதேச ஆய்வுக் குழுவினர் இந்தக் கோளை ஆய்வு செய்தனர். இதில் பர்மிங்காம் பல்கலைக்கழகத்தைச் சேர்ந்த அஞ்சலி பியட் உள்ளிட்ட அறிஞர்கள் பங்கேற்றனர். ஆய்வில் இந்தக் கோளின் வளிமண்டலத்தில் கார்பன் மற்றும் ஆக்சிஜன் போன்ற கனமான தனிமங்கள் மிகக் குறைவாகவே உள்ளன. தாய் நட்சத்திரத்தைவிட கோளில் உலோகத்தன்மை குறைவாக இருப்பது இதுவே முதல்முறை. கோள் உருவாகும் போதே கனமான பொருட்கள் அதன் மையப்பகுதிக்குச் சென்றுவிட்டன. அதன் வளிமண்டலத்தை விட உட்புறம் 100 மடங்கு அதிக கனமான தனிமங்களைக் கொண்டிருக்கலாம் என கணிக்கப்பட்டுள்ளது. நட்சத்திரத்தின் ஒளியைப் பகுப்பாய்வு செய்தபோது, அதன் வளிமண்டலத்தில் மீத்தேன் மற்றும் ஹைட்ரஜன் சல்பைடு இருப்பது உறுதி செய்யப்பட்டுள்ளது. மேலும், இது கார்பன் அதிகமாகவும், ஆக்சிஜன் குறைவாகவும் கொண்ட ஒரு விசித்திரமான கலவையைக் கொண்டுள்ளது. நட்சத்திரங்களில் இருக்கும் கரும்புள்ளிகள் தரும் தவறான தகவல்களை சரிசெய்து, ஜேம்ஸ் வெப் தொலைநோக்கி மூலம் இந்த உண்மைகளை கண்டறிந்துள்ளனர். கோள்களின் உருவாக்கம் குறித்த நமது பாடப்புத்தகங்களை மாற்றியமைக்க வேண்டிய நேரம் வந்துவிட்டது என்பதை இந்த TOI-5205 b உரக்கச் சொல்கிறது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
