சயின்ஸ் பிக்ஷன் படங்களில் வருவதைப் போல, பல கோடி ஆண்டுகளுக்கு முன்பு வாழ்ந்த டைனோசரின் மரபணுவை வைத்து ஒரு சொகுசு கைப்பையை உருவாக்கியுள்ளனர் விஞ்ஞானிகள். உயிரி தொழில்நுட்பமும் (Biotechnology), உயர்தர ஃபேஷனும் (High Fashion) இணைந்த இந்த விந்தையைப் பற்றி விரிவாகப் பார்ப்போம். நெதர்லாந்து நாட்டின் ஆம்ஸ்டர்டாம் நகரில் உள்ள 'ஆர்ட் ஜூ' அருங்காட்சியகத்தில், ஒரு பிரம்மாண்ட டி-ரெக்ஸ் (T. rex) டைனோசர் மாதிரியின் கீழே, நீலப்பச்சை நிறத்தில் மின்னும் இந்த கைப்பை காட்சிக்கு வைக்கப்பட்டுள்ளது. வரும் மே 11-ஆம் தேதி வரை மக்கள் இதைப் பார்க்கலாம். அதன் பிறகு ஏலம் விடப்பட உள்ளது. இதன் ஆரம்ப விலையே 5 லட்சம் டாலர்கள் (இந்திய மதிப்பில் ரூ.4.15 கோடி) என நிர்ணயிக்கப்பட்டுள்ளது. எலும்பு எப்படித் தோலானது? இந்தக் கைப்பையை உருவாக்கப் பயன்படுத்தப்பட்டது சாதாரணத் தோல் அல்ல, ஆய்வகத்தில் உருவாக்கப்பட்ட 'டைனோசர் கொலாஜன்' ஆகும். அமெரிக்காவில் கண்டறியப்பட்ட டி-ரெக்ஸ் படிமங்களில் (Fossils) இருந்து சிதைந்த நிலையில் இருந்த கொலாஜன் புரதத் துண்டுகளை விஞ்ஞானிகள் எடுத்தனர். அந்தப் புரதத் துண்டுகளில் இருந்த மூலக்கூறு தகவல்களைக் கொண்டு, நவீன மரபணு பொறியியல் மூலம் டைனோசர் புரதத்தை ஒத்த புதிய கொலாஜனை ஆய்வகத்தில் வளர்த்தெடுத்தனர். மனித உடல் மற்றும் விலங்குகளின் தோல், எலும்பு, தசை உறுதியையும் நெகிழ்வுத்தன்மையையும் தருவது இந்த கொலாஜன்தான். இதைப் பதப்படுத்தி, மிக உறுதியான தோல் போன்ற பொருளாக மாற்றியுள்ளனர். 'லேப்-குரோன் லெதர்' நிறுவனத்தின் சி.இ.ஓ. சேகோனன் கூறுகையில், இது வெறும் ஒரு மாற்றுப் பொருள் அல்ல; இது ஒரு தொழில்நுட்ப மேம்பாடு. இயற்கையான தோலை விட அதிக நீடித்த உழைப்பையும் தரத்தையும் இந்த லேப்-லெதரில் நாம் கொடுக்க முடியும் என்கிறார். இந்த சாதனையைச் சிலர் வியந்து பாராட்டினாலும், ஒரு தரப்பு விஞ்ஞானிகள் இதற்கு 'டைனோசர் தோல்' எனப் பெயரிடுவதில் தயக்கம் காட்டுகின்றனர். டைனோசரின் கொலாஜன் எலும்பிலிருந்து எடுக்கப்பட்டது, தோலில் இருந்து அல்ல. எனவே, உண்மையான டைனோசர் தோலின் அமைப்பை அப்படியே கொண்டு வருவது சாத்தியமில்லை என்பது அவர்களது வாதம். ஆனால், விமர்சனங்கள் முன்னேற்றத்தின் ஒரு பகுதி தான்; டைனோசர் புரதத்தை மீட்டெடுப்பதில் இதுவரை எடுக்கப்பட்ட நெருக்கமான முயற்சி இதுவே எனத் திட்டக் குழுவினர் பதிலளித்து உள்ளனர். விலங்குகளைக் கொல்லாமல், ஆய்வகத்திலேயே தேவையான பொருட்களை 'வடிவமைக்கும்' (Engineered) எதிர்காலத்திற்கு இந்த டி-ரெக்ஸ் கைப்பை ஒரு மிகச்சிறந்த தொடக்கமாகப் பார்க்கப்படுகிறது. அறிவியலும் கலையும் இணைந்தால் என்னவெல்லாம் சாத்தியம் என்பதற்கு இந்த 'டைனோசர் பேக்' ஒரு வாழும் சாட்சி.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
