ரயில் பயணிகளுக்கு குட் நியூஸ்: சென்னை சென்ட்ரல் வழியாக இயக்கப்படும் 6 ரயில்களில் கூடுதல் பெட்டிகள் இணைப்பு

கோடைக்கால பயணிகளின் வருகை அதிகரிப்பதைக் கருத்தில் கொண்டு, சென்னை சென்ட்ரல் வழியாக இயக்கப்படும் சப்தகிரி உள்ளிட்ட 6 முக்கிய விரைவு ரயில்களில் கூடுதல் பெட்டிகளை இணைக்கத் தெற்கு ரயில்வே முடிவெடுத்துள்ளது. இதற்கான அறிவிப்பு அதிகாரப்பூர்வமாக வெளியிடப்பட்டுள்ளது. பொதுவாக கோடை விடுமுறை மற்றும் பண்டிகை காலங்களில் நிலவும் கடும் கூட்ட நெரிசலைச் சமாளிக்கத் தெற்கு ரயில்வே சிறப்பு ரயில்களை இயக்குவது வழக்கம். அதன் ஒரு பகுதியாக, தற்போது பயன்பாட்டில் உள்ள வழக்கமான ரயில்களில் கூடுதல் பெட்டிகளைத் தற்காலிகமாக இணைப்பதன் மூலம் பயணிகளின் வசதியை மேம்படுத்தத் திட்டமிடப்பட்டுள்ளது. இதன்படி, சென்னை சென்ட்ரல் - திருவனந்தபுரம் இடையேயான ஏசி அதிவிரைவு ரயிலில் (22207/22208) மார்ச் 31 முதல் மே முதல் வாரம் வரை இரண்டு கூடுதல் ஏசி மூன்றடுக்கு பெட்டிகள் சேர்க்கப்படும். சென்னை - திருப்பதி வழித்தடத்தில் மிகவும் பிரபலமான சப்தகிரி விரைவு ரயில் (16053/16054) மற்றும் மற்றொரு திருப்பதி விரைவு ரயிலில் (16057/16058) மார்ச் 30 முதல் ஜூன் 2-ம் தேதி வரை கூடுதலாக ஒரு இருக்கை வசதி கொண்ட பெட்டி இணைக்கப்பட உள்ளது. அதேபோல், சென்னை - ஈரோடு இடையே இயக்கப்படும் ஏற்காடு அதிவிரைவு ரயிலிலும் (22649/22650) ஏப்ரல் மாதம் முதல் ஜூன் தொடக்கம் வரை ஒரு இரண்டாம் வகுப்பு தூங்கும் வசதி பெட்டி கூடுதலாகச் சேர்க்கப்படும். இந்த தற்காலிக மாற்றங்கள் மூலம் கோடை விடுமுறை காலத்தில் திருப்பதி, திருவனந்தபுரம் மற்றும் ஈரோடு போன்ற முக்கிய நகரங்களுக்குப் பயணம் செய்வோர் எளிதாகத் தங்களது பயணத்தைச் மேற்கொள்ள முடியும் என எதிர்பார்க்கப்படுகிறது.