50 ஆண்டுகளுக்குப் பிறகு, நிலவைச் சுற்றி மனிதர்களை அழைத்துச் செல்லும் நாசாவின் வரலாற்றுச் சிறப்புமிக்க ஆர்டெமிஸ் II விண்கலம், நிலவின் மர்மமான பல பகுதிகளைப் படம்பிடித்துப் பெரும் சாதனை படைத்துள்ளது. ஓரியன் விண்கலத்தில் பயணித்த 4 விண்வெளி வீரர்கள், பூமியில் இருந்து எப்போதும் மறைந்திருக்கும் நிலவின் மறுபக்கத்தை மிக நெருக்கமாகவும் துல்லியமாகவும் ஆய்வு செய்துள்ளனர். ஏப்.7, செவ்வாய்கிழமை இரவு (இந்திய நேரப்படி சுமார் 7:10 மணி), நெகிழ்ச்சியான தருணம் நிகழ்ந்தது. நிலவின் பின் விண்கலம் சென்றபோது ஏற்பட்ட 40 நிமிட தகவல் தொடர்பு துண்டிப்பிற்குப் பிறகு, நிலவின் விளிம்பில் இருந்து பூமி மெல்லத் தோன்றியது. கருப்பு நிறப் பால்வெளியில் பூமி ஒரு நீல நிறப் பந்து போலத் தொங்கிக் கொண்டிருக்கும் இந்தக் காட்சி, இந்தப் பயணத்தின் மிகச்சிறந்த அடையாளமாகப் பதிவாகியுள்ளது. நிலவு தன்னைத்தானே சுற்றும் வேகமும், பூமியைச் சுற்றும் வேகமும் சமமாக இருப்பதால் (Tidal Locking), நம்மால் அதன் ஒரு பக்கத்தை மட்டுமே பார்க்க முடியும். ஆனால், ஏப்.7 அன்று வழங்கப்பட்ட 7 மணி நேர கால அவகாசத்தில், வீரர்கள் நிலவின் முன் மற்றும் பின்பக்கம் இரண்டையும் அதிநவீன கேமராக்கள் மூலம் படம்பிடித்தனர். நிலவின் பகல் மற்றும் இரவுப் பகுதியைப்பிரிக்கும் எல்லைக் கோட்டை வீரர்கள் ஆய்வு செய்தனர். அங்கு சூரிய ஒளி சாய்வாக விழுந்ததால், பிர்கோஃப் (Birkhoff) மற்றும் ஸ்டெபின்ஸ் (Stebbins) போன்ற பள்ளங்கள் முப்பரிமாண (3D) வடிவில் மிகத் தத்ரூபமாகக் காட்சியளித்தன. சுமார் 965 கி.மீ அகலம் கொண்ட ஓரியண்டல் பேசின் எனும் பிரம்மாண்ட பள்ளத்தையும் வீரர்கள் படம்பிடித்தனர். பல பில்லியன் ஆண்டுகளுக்கு முன்பு விண்வெளிப் பாறை மோதியதால் உருவான இந்த பள்ளத்தின் விளிம்புகள், மலை அலைகளைப் போலக் காட்சியளிக்கின்றன. இந்தப் பயணத்தின் போது ஓரியண்டல் பேசின் அருகே கண்டறியப்பட்ட 2 சிறிய பள்ளங்களுக்கு, விண்கலத்தின் நினைவாக 'இண்டெக்ரிட்டி' என்றும், கமாண்டர் ரீட் வைஸ்மேனின் மறைந்த மனைவியின் நினைவாக 'கரோல்' என்றும் பெயரிடப் பரிந்துரைக்கப்பட்டுள்ளது. மேலும், விண்கலம் நிலவின் பின்னால் நகர்ந்தபோது ஏற்பட்ட 1 மணி நேர முழு சூரிய கிரகணத்தின்போது, விண்வெளி வீரர்கள் சிறப்பு கண்ணாடிகளை அணிந்து சூரியனின் வெளிப்புற வளிமண்டலமான 'கொரோனா' (Corona) பகுதியை ஆய்வு செய்தனர். இந்த ஆர்டெமிஸ் II திட்டம், எதிர்காலத்தில் மனிதர்கள் மீண்டும் நிலவில் தரையிறங்குவதற்கான ஒரு முன்னோட்டமாகும். விண்வெளி வீரர்கள் சேகரித்துள்ள இந்த உயர்தரப் புகைப்படங்கள் மற்றும் தரவுகள், நிலவின் நிலப்பரப்பை ஆழமாகப் புரிந்துகொள்ளவும் அறிவியல் ஆய்வுகளுக்கும் மிகப்பெரிய அளவில் உதவும் என்று நாசா தெரிவித்துள்ளது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
